Ұйықтарда дәрет алып жатудың мәні неде?
Ұйықтарда дәрет алып жатудың мәні неде?
2 жыл бұрын 4088

Әссәләмуғалейкум! Менің сіздерден сұрайын дегенім, дәрет алып жатудың маңыздылығы қандай? Толығырақ түсіндіріп берсеңіздер. Мүмкін болса, хадистермен. Алла разы болсын. Тәубе Тілеуберді

Уағалейкум ассәләм уа рахматуллаһи уә бәракәтуһ!

Ұйықтар алдында дәрет алып жату - мүстахаб. Оның сауаптылығын Алла елшісі (с.а.у.) бірнеше хадисінде атап өткен. Ол (с.а.у.) бір сахабасына: «Намазға алатын дәретті жататын кезде де алып жат...»- деп кеңес еткен[1].

Тағы бір хадисінде: «Денелеріңді таза ұстасаңдар, Алла сендерді (рухани) тазартады. Түнде тазаланып (дәрет алып) ұйықтаған пенденің басы-қасынан бір періште айырылмай, пенде бір жақ қырынан екінші жақ қырына ауысып жатқан сайын ол үшін Жаратушыдан: «О, Раббым! Мына пендеңнің күнәсін кеш. Шынында ол тазаланып ұйықтады», - деп тілейді», - деген Алла елшісі (с.а.у.) [2].   

 Дәрет алып жатудың пайдаларын былайша тізбектеуге болады:

  1. Кіші күнәлардың кешірілуіне себеп.
  2. Шынайы, яғни рахмани түстерді көруіне сеп болады.
  3. Ұйқысында шайтанның әзәзілінен ұзақ әрі қорқынышты түстер көрмеуіне септігін тигізеді.
  4. Ұйқы - кіші өлім екені мәлім. Ажал жетіп, о дүниелік болып кеткен жағдайда таза, дәретпен кеткен болады.
  5. Ұйықтар алдында жұққан түрлі микробтар адам ұйқыға кеткеннен кейін қимылсыз жатқан денеде одан сайын көбейіп, саны арта түседі.  Ал, дәрет алу арқылы сол нәрсенің алдын алған боламыз.

Ең дұрысы – Аллаға мәлім!

[1] Сахих Бухари: Бәбу фазли мән бәтә ъаләл уду, №244 хадис.
[2] Табарани – әл-Муъжәмул Әусат. 

Абдусамат Қасым