Күйеуімнің өгей әкесі маған "махрам" болып санала ма? Қара және қызыл түсті көлікті ала беруге бола ма?

Уағалейкумуссәләм уә рахматуллаһи уә бәракәтуһ!

1.) Құрметті сауал қоюшы, күйеуіңіздің өгей әкесі сіз үшін «махрам»[1] болып саналмайды. Сондықтан да, шариғи тұрғыда айтқанда ол кісінің алдында шариғат шәлісімен жүру керек болады.
Еске сала кетсек, келіні өзінің туған ата-енесінің алдында хижапсыз жүре алады. Өйткені, күйеуінің ата-анасы оның да ата-анасы іспетті.

2.) Қара түсті көлікті де, қызыл түсті көлікті де алудың ағаттығы жоқ. Пайғамбарымыздың (с.а.у.) кезінде қызыл түйе мінгендер де, қара жылқы мінгендер де болды[2]. Ешкім оларды «құтсыз» деп санамаған. Керісінше, Алла елшісінің (с.а.у.): «خيرُ الخيلِ الأدهَمُ», - деген сөзі бар. Оның мағынасы: «Жылқының ең абзалы – қара түстісі...»[3].

[1] Махрам – өмірлікке үйлене алмайтын туысы.
[2] Әл-Һәйсәми: Мәжмәъ» т.б.. Осы тұрғыда бір «өте әлсіз хадисте»: «Шынында шайтан қызыл түсті жақсы көреді. Сондықтан, қызыл түстіден және жұрттың назарын өзіне қаратар киімнен ұзақ тұрыңдар», - делінген. Хадис өте әлсіз болғандықтан, харам не мәкруһ үкімі шықпайды. Оның үстіне Пайғамбардың өзі кейде қызыл түсті «хүллә» деп аталатын киім кигендігі сахих хадистер келтірілген.
[3] Имам Тирмизи: «Сүнәнә» - №1696: خيرُ الخيلِ الأدهَمُ الأقرَحُ الأرثَمُ ، ثمَّ الأقرَحُ المُحجَّلُ طَلقُ اليمينِ ، فإن لم يَكُن أدهَمُ فكُمَيْتٌ علَى هذِهِ الشِّيَةِ

Абдусамат Қасым