Гуэлф университетінің ғалымдары қысқан кезде электр энергиясын өндіретін «слайм» әзірледі. Бұл жайында islam.kz порталы gizmodo.com ақпарат көзіне сілтеме жасай отырып мәлім етеді. Бір қарағанда, жаңа материал балалар ойыншығына ұқсайды, алайда, ол медицинада, фармацевтикада және робот техникасында теңдесі жоқ жетістік ретінде алға шығады. «Шырыш» зәйтүн қышқылынан (зәйтүн майының құрамында кездеседі), амин қышқылынан және судан тұрады. Ғалымдардың айтуынша, өзгеше материалдың организмге зияны жоқ. "Біздің денеміз ашық жараның еміне жауапты жасушаларды тарту үшін шағын электр өрістерін жасайды. Егер осы электр өрісін күшейтетін таңғыш жасасақ, теориялық тұрғыдан сауығу процесі жылдам жүруі мүмкін. Бұл жағдайда таңғыш біздің табиғи қимыл-қозғалысымызбен және тыныс алуымызбен іске қосылады ", - деп түсіндірді аталмыш зерттеуге атсалысқан Гуэлф университетінің эколог инженері Эрика Пенсини. Ғалымның айтуынша, «шырышты» теориялық тұрғыдан синтетикалық теріні жасауда қолдануға болады, ол болашақ роботтарға пациенттің тамыр соғысын өлшеуді үйретеді. Сондай-ақ, адамдардың жүріс-тұрысын талдай алатын аяқ киім ұлтанында. Оның үстіне, «слайм» электр энергиясын шығаратындықтан, оны еденге немесе би алаңына салып, қозғалыс арқылы энергия алуға болады.