Бухари мен Муслимнің хадистер жинағын мәһр ретінде сұрауға бола ма?

Сәлеметсіз бе! Қадірменді Шарапат, бір затты мәһр (неке сыйы) ретінде есептеуіміз үшін:

Біріншіден - дінде халал деп саналатын, материалдық құны бар және қол жетімді зат болуы керек (әл-Мәлул Мүтәқайюм)[1]. Мысалы: киім-кешек, компьютер, планшет, ұялы телефон, ақша, үй, т.б.

Екіншіден – аяғы дауға ұласпау үшін берілетін заттың түрі, саны, сорты сияқты ерекшеліктері нақтыланғаны дұрыс[2]. Мысалы, келіскен мәһр киім-кешек болса, бұл жағдайда әлгі киім-кешек санатына жататын киімнің нақты бір түрі айтылуы тиіс: көйлек немесе етек немесе күртеше т.б.

Үшіншіден - ең азы он дирхам күмістің құнына сай болуы керек[3]. Мәһрдің ең аз мөлшерін ардақты Пайғамбарымыз мына сөзімен бекіткен: «... он дирһамнан кем мәһр жоқ..»[4].

Ендеше, сіздің айтып отырған хадис жинақтарының материалдық құны болса, және ең кемі - он дирхам күміске сай келсе, оны мәһр ретінде сұраудың ағаттығы болмас. Ең дұрысы - Аллаға мәлім!

[1] Абдул Уәһһаб әл-Хиләф: әл-Әхкәмул ахуалуш шахсия – 76 бет; Маусули, әл-Ихтияр – 3/89 –бет; Әл-Кәсәни, Бадаиғ – 3/491-бет;
[2] У.Зухайли, әл-Уәжиз – 3/97 бет.
[3] Ибн Ғабидин, Раддуль Мухтар – 4/232 бет. 7/10 бет.; Абдуррахман Жазири: әл-фиқһ ъалал мәзәхибил арбаъа – 4/90 бет;
[4] Даруқутни сүнәні; Бәйһақи.

Абдусамат Қасым