Моңғолиядағы бүркітші қазақ қызы туралы деректі фильмнің трейлері желіде жарық көрді.

Атқарушы продюсері Дэйзи Ридли болған бұл фильм “Сандэнс” кинофестивалінің сенсациясына айналды. Мұнда деректі фильм режиссері Отто Беллдің “The Eagle Huntress” балаларға арналған фестиврльдің “Сандэнс Кид” бөлігінде дебютке айналды.

24 жастағы ағылшындық актриса және продюсер Дэйзи Ридли режиссер Отто Беллдің «The Eagle Huntress» деректі фильмінде кадр сыртындағы сөздерді оқиды. Фильм ата-бабаларының дәстүрін жалғастырып, бүркітші өнерін меңгеріп жатқан қазақ қызы Айшолпан Нұрғайып туралы баяндайды.

Отто Белл ұлыбританиялық режиссер, алайда Нью-Йоркте жұмыс істейді. Режиссер "The National Geographic"-ке берген сұхбатында қыздың қайсарлығына тамсанатынын айтты. Оның сөзіне қарағанда, Айшолпан өз-өзіне сенімді бүркітші. Түсірілім кезінде ол өз әрекеттеріне еш күманданбаған. Үш адамнан тұратын түсірілім тобы 50 градус аязда тоңып, әрең қозғалса, Айшолпан тізесінен жоғары қалың қармен жүріп, 15 келіден астам бүркітті көтеріп жүрді. Отто Белл атап өткендей, ұяңдығына қарамастан Айшолпан камера алдында өзін жақсы ұстай білді. Айшолпанды жанындағылары, әсіресе, әкесі қолдайды. 

Айта кету керек, бүркітпен аң аулау ерлердің ісі деп саналады. Әлем бойынша бұл өнермен 2 әйел адам айналысады екен. Екеуі де қазақ. Қазақстанда бүркітші қыз Мақпал Әбдіразақова бар.

"Youtube" видеохостингінде бүркітші қызға қатысты тағы да бір бейнеролик жарияланды.