Бисмилләһир рахманир рахим
Дұға - ең пайдалы дәрумен. Ол бәле-жалаға дұшпан. Дұға басқа төніп тұрған бәлені қайтарады, оны емдейді, оның түсуіне кедергі жасайды, келіп тұрған бәлені бертарап етеді немесе келген бәлені жеңілдетеді. Дұға - мұсылманның қаруы. Пайғамбарымыз (с.а.у.) өзінің бір сөзінде айтқандай: «Дұға - мүміннің қаруы, діннің тірегі және көктер мен жердің нұры».
Дұға мен бәленің арақатынасы
Дұға мен бәленің арақатынасы үш түрлі болып келеді:
- Дұға бәледен қуаттырақ болып, оны бертарап етеді.
- Дұға бәледен әлсіздеу болып, бәле үстем келеді де, пендеге тимей қоймайды, бірақ дұға одан әлсіз болса да ол бәленің жеңіл-желпі өтіп кетуін қамтамасыз етеді.
- Дұға мен бәленің теңдей күште болулары. Ол екеуі бір біріне кедергі болып тұрады.
Пайғамбарымыз өзінің асыл сөздерінің бірінде:
«الدُّعَاءُ يَنْفَعُ مِمَّا نَزَلَ وَمِمَّا لَمْ يَنْزِلْ، فَعَلَيْكُمْ عِبَادَ اللَّهِ بِالدُّعَاءِ» .
«Дұға - түскен бәлеге қарсы да, әлі түсіп үлгермеген бәлеге қарсы да пайдалы. Сондықтан да, ей Алланың құлдары, дұға жасаудан жалықпаңдар!» - деген.
Басқа бір хадисінде былай деген:
«لَا يَرُدُّ الْقَدَرَ إِلَّا الدُّعَاءُ، وَلَا يَزِيدُ فِي الْعُمُرِ إِلَّا الْبِرُّ، وَإِنَّ الرَّجُلَ لَيُحْرَمُ الرِّزْقَ بِالذَّنْبِ يُصِيبُهُ» .
«Пешенедегіні тек дұға қайтарады. Өмірді тек ізгі іс ұзартады. Кісі басына келген күнәсі себепті, несібеден қағылады» - дейді Алла елшісі.
Ендеше, дұға жасағанда табандылық танытқан жөн. Бір рет дұға тілеп, қоя салу жарамайды. Дұғаңызды табанды түрде жасай беруіңіз керек. Хадисте:
«إِنَّ اللَّهَ يُحِبُّ الْمُلِحِّينَ فِي الدُّعَاءِ»
«Алла Тағала дұғасында табанды болған пендесін жақсы көреді» делінген.
Тағы бір сөзінде:
«لَا تَعْجِزُوا فِي الدُّعَاءِ فَإِنَّهُ لَا يَهْلِكُ مَعَ الدُّعَاءِ أَحَدٌ» .
«Дұғада әлсіздік танытпаңдар. Шынында, дұғасы болған адам құрымайды» дейді.
А. Қасым.
