Іргетасы 1889 жылы қаланған Мәжид-Үлия мешіті Пәкістан астанасының федералды аумағында орын тепкен Марғалла жотасының етегінде орналасқан. Туристердің көзайымына айналған әрі сәулетшілердің таңдайын қақтырған бірегей мешіт шағын болғанымен әктен тұрғызылып, қыш тақташалармен көмкерілген. Мешіттің өзгеше сәулетінде османдықтардың қолтаңбасы менмұндалап тұрады. Көне болғанымен өзгеше сәулетімен көз тартатын мешіт әлі күнге сымбатын жоғалтпаған. Яғни, бір ғасырдан астам уақыт сынына төтеп берген мешітке әлі күнге жөндеу жұмыстары жүргізілмеген. Тек 1992 жылы шатыры жаңаланғаны болмаса.