Сәресі уақытын күн шығысымен тоқтату керек пе?
Сәресі уақытын күн шығысымен тоқтату керек пе?
3 жыл бұрын 3193

Ассаламу алейкум, оразаларыныз қабыл болсын!
Бүгін ОҚО, Сарыағаш ауданы бойынша ауыз бекіту уақыты 04:20-да, ол уақытта бізде дала тас қараңғы. Ал ниетімізде таң атқаннан күн батқанға дейін деп Аллаға жалбарына дұға тілеп ауыз бекітеміз. Сұрарым, күн әлі де 1-2 сағаттан кейін шығады, сол уақытқа дейін ауыз бекітуді жалғастыра берсе болмай ма? Алпамыс.

Уағалейкумуссалам, ораза бәрімізге мүбәрәк болсын! Алпамыс, сәресінің аяқталу уақыты күннің шығуымен емес, таң намазының кіруімен есептеледі. Ендеше, аймағыңыздағы кесте бойынша таң намазы 04:20 кіретін болса, осы уақытқа дейін ауыз бекітіп үлгеруіңіз керек. Яғни, таң намазының уақыты кірісімен ішіп-жеуді тоқтату керек.

Құран Кәрімде ауыз бекіту уақыты жайында былай делінген: «...Таңға дейін, (яғни) «қара жіп» «ақ жіптен» айрылғанға дейін ішіңдер, жеңдер, содан соң оразаны кешке дейін толық орындаңдар...»[1] Бұл аяттағы «қара жіп» – түнді, ал «ақ жіп» таңды білдіреді. Яғни, қараңғылық кетіп, таң анықтала бастаған уақытта ішіп-жеуді тоқтату керек деген сөз.

Сондай-ақ, Пайғамбарымыздың (с.а.у.) кезінде сәресі уақытында екі азан айтылатын: бірі сахаба Біләлдің азаны, екіншісі сахаба Умму Мәктумның азаны.

Хз.Біләлдің азаны таң намазының уақыты кірмей тұрып айтылатын, ал Хз.Умму Мәктүмның азаны таң намазы кірісімен айтылады.  Пайғамбарымыздың (с.а.ғ) осы екі азан арасында сәресі ішкендігі, екінші азанда намазға тұрғандығы сахаба Зәид ибн Сәбиттен риуаят етілді[2].

[1] Бақара – 187 аят.
[2] Әл-Асқалани, Фатхуль Бари, Бабу Уақтиль Фәжр: 550 хадис түсіндірмесі.

Абдусамат Қасым