Пітір садақаны мүгедек немесе науқас адамның есепшотына салуға бола ма?
Пітір садақаны мүгедек немесе науқас адамның есепшотына салуға бола ма?
5 ай бұрын 2566

Әссәләмуғалейкум уа рахматуллахи уә бәракатуһ! Пітір садақаны мүгедек балаға каспий арқылы ниет етіп аударуға бола ма?

Уағалейкумуссәләм уә рахматуллаһи уә бәракәтуһ!

Пітір садақада ең бастысы мұқтаж жанның иелігіне өту. Сол себепті, пітірді онлайн түрде мүгедек немесе науқас адамның есепшотына ниет етіп аударып жатсаңыз, оныңыз саналады. Бірақ мына төмендегі шарттар ескерілуі ләзім: 

Пітірді есепшотына аударғыңыз келген мүгедек немесе науқас адам:

1. Тұрмысы төмен, кедей болуы керек. (Ең кемі 85 грамм алтыңға тең келер қажетінен тыс артық дүниесі (заттай болса да) бар адам кедей санатына жатпайды, олай болған жағдайда, пітір берілмейді, нəпіл садақа беруге болады жəрдем ретінде).

2. Мұсылман болуы шарт. Мұсылман емеске пітір мен зекет ақшасы берілмейді. (Нәпіл садақалар беріле береді).

3. Сенімділік. Үшінші пунк ретінде сенімділікті атап өтсек болады. Өйткені, бүгінде интернет кеңістігінде науқас адамдардың есебінен қалтасын қалыңдатып алғысы келетіндер де табылып жататындығы жасырын емес.

4. Және төртінші маңыз аударатын жәйт – пітірді онлайн түрде бергіңіз келген кісіңіз өзіңіздің тұратын елді-мекендегі адам болғаны жөн. Өйткені, пітір садақасын басқа елді-мекенге жолдау мәкруһ саналған. "Әуелі өзі тұратын аймақтағы мұқтаж жандарға берілу керек" делінген кітаптарда. Бұған байланысты Имам Мұхаммед (р.а.) былай дейді: «Пітір садақаны – өзінің атынан өзі тұрған жерде өтейді. Пітір садақасын басқа жерге жолдауы – мәкруһ»[1]. 

Алла Тағала берген пітір садақаларыңызға еселеп сауап жазғай! 


[1] Имам Сәрәхси: әл-Мәбсүт. 3/106 бет.

Абдусамат Қасым