Футболшыларға ораза ұстамауға рұқсат берген пәтуә бар ма?
Футболшыларға ораза ұстамауға рұқсат берген пәтуә бар ма?
2 жыл бұрын 3511

Ассалаумағалейкум! Білесіздер қазір Әлем Чемпионатынан футбол жарысы өтіп жатыр. Сондағы мұсылман футболистерді көрген сайын «оразаны не істейді екен?» деген ой келеді. Футболистерге арналған пәтуа берілген бе? Нұрқанат

Уағалейкумсалам, Нұрқанат! Осыдан 6 жыл бұрын Мысыр еліндегі Пәтуа Кеңесі (Дарул Ифта) футбол ойыншысына қатысты мынадай пәтуа жария еткен болатын: «Кәсіби футбол ойыншысы белгілі спорт клубымен келісім шарт бойынша жұмыс істейді. Осы тұрғыдан алып қарағанда оны да жалданған жұмысшыға ұқсатуға болады.  Жалданған жұмысшы өз ісін атқаруы тиіс екені мәлім. Сондықтан келісім жасасқан ісі табыс көзі боп саналатын футболшы, ораза себепті міндетін ойдағыдай атқара алмайтынына сенімді болса және чемпионаттан бас тартуға еш мүмкіндігі болмай жатса, онда оған ауыз бекітпеуіне рұқсат. Өйткені (ертеректегі) ғалымдар жалданып жұмыс істейтін жұмысшының немесе ісі ауыр кәсіп иесінің ауыз бекітуі күнделікті тіршілігін жүргізуге кедергі келтіріп жатса яки дәрмәнсіз етсе онда оған ауыз бекітпеуге рұқсат деген»[1]...

Алайда бұл пәтуаға қарсы шыққандар да аз болмады. Олардың ойынша: «Ойын қай жағдайда болмасын – ойын.  Футбол ойыны - Рамазан айында ауыз бекітпеуге себеп болатындай зәру жағдай қатарына кірмейді».

Бұнымен қатар, «рамазанда жаттыққан футболшы тұрғылықты жерінде қиналса да ораза ұстайды. Ал, бөтен қалада жолаушы үкіміне кіретіндіктен, ораза ұстамауларына болады» деген тұжырымды көлденең тартқан ілім иелері де болды.

[1] http://www.dar-alifta.org/viewfatwa.aspx?id=1202&mu&Home=1&LangID=1

Абдусамат Қасым