Тұмар тағуға бола ма?
Тұмар тағуға бола ма?
3 жыл бұрын 2902

Ассалаумағалейкум! Кейде жас балдардың немесе үлкендердің тұмар тағып жүргенін байқаймыз.  Менің естуім бойынша шариғатқа теріс дейді. Осы қаншалықты рас? Қанат

Уағалейкумусалам! Қанат мырза, жалпы тұмар тағуды Пайғамбарымыз тыйғаны рас. Ол өзінің бір хадисінде: «Кім тұмар тағатын болса, Алла тағала оған денсаулық бермесін»[1] десе, басқа хадисте«Кім тұмар тақса, Аллаға серік қосқаны» делінген. Осыған қарап сахабалардан Абдулла ибн Мәсъуд, Абдулла ибн Аббас, Хузайфа, Ъуқба ибн Ъамир  тұмарға түбегейлі қарсы шыққан.  

Әйтсе де тек Құран аттары мен хадисте келкен дұғалар жазылған тұмарға рұқсат деген сахабалар болған.   Атап айтсақ сахаба Айша анамыз, Абдулла ибн Амр ибн Ас, Абдулла ибн Омар (р.а.). Осыған қарап Ханафи, Мәлики, Шәфиъи ғалымдары ғалымдар «Ішінде Құран аяттары жазылған тұмарды тағудың әбестігі жоқ»[2] және «аталмыш хадистерде тұмардан медет тілеуге тыйым салынған, ал Құран аяттарын таққан адам Аллаға сыйынары анық» деп Құран аяттары жазылған тұмарды тағуға рұқсат берген[3].

Дегенмен, Құран аяттары жазылған тұмарды да тек сабилерге таққан дұрыс. Ал үлкен кісілер Құран аяттарын жаттап алып күнсайын ұйқыға жатар кезде өздеріне дем салып жүруі ардақты Пайғамбарымыздың сүннетіне жатады[4]. Яғни бұлай жасаудың бұл дүниедегі пайдасымен бірге сауабы да болмақ. Өйткені Абдулла бин Омар Пайғамбардан үйренген дұғаны сәбилерге тұмар етіп тағып,  ересек балаларға жаттататын болған[5].

[1] Ахмәд – 16781;
[2] ИбнАбидин – 9/523 бет.; Әл Маусуғатуль Фиқһия – 14/30 бет
[3] Әл-Маусуғатул фиқһия – 13, 14 том/30-32 бет. Кувейт.;Құртуби тәпсірі, Исра сүресі  82 аят – 10/319-320 бет; 
[4] Тирмизи, Дағауат – 3402.
[5] Тирмизи, Дағауат – 3528.
Абдусамат Қасым