Уағалейкумәссәләм уә рахматуллаһи уә бәракәтуһ!

Хадистерге қарағанда, пейіштегі адамдар отыз үш жаста болады. Сахаба Мұғаз ибн Жәбәлдан жеткен хадисте Пайғамбарымыз (с.а.у.) былай деген:

«Пейіш иелері пейішке денелері түксіз, иегі сақалсыз, қастары сүрмелі (қастары мен кірпіктері сүрме жаққандай қап-қара), отыз не отыз үш жаста болған күйі кіреді»[1].

Басқа бір риуаятта, бойларының ұзындығы - Адам атаның бойындай алпыс зираъ (шамамен 30 метр), түрлері - Юсуф пайғамбардың сұлулығындай сұлу, ал, жастары - Иса пайғамбардың жасындай отыз үш жасар болатындығы айтылған.  

Сондай-ақ, олар еш егде тартпастан сол жаста мәңгі қала бермек. Сахаба Әбу Һурайрадан риуаят етілген хадисте Алла елшісі былай дейді:

«Пейіштегілер – түксіз, сақалсыз және сүрмелі болады. Олардың жастықтары жойылмайды (қартаймайды), киімдері ескірмейді»[2].  

Жаратушы Жаббар Иеміз баршамызды жәннәт иелерінен еткей!