Жеті шелпек тарату ширк па?
Жеті шелпек тарату ширк па?
2 жыл бұрын 21943

Әссәләмуғалейкум! Біздер баяғы ата-бабаларымыздан, әжелерімізден сақталып қалған әр жұма сайын 7 шелпек пісіруді ұмытқан жоқпыз. Соны әлі де болса, жалғастырудамыз. Өлі әруаққа оқылған Құранның сауабы тиері сөзсіз. Ал, 7 шелпек иіс шығаруымыз дұрыс па? Өтінемін, осыған жауап берсеңіздер екен! Алла разы болсын! Рахмет.  

Ләззәт.

Уағалейкумәссалам! «Жеті шелпек пісіру» үрдісінің біздің қазақ дәстүріне қайдан қалыптасқаны, қандай нанымнан туындағаны жайында айтылған нақты дерек кездестірмедік. Бірақ, біздің түсінігімізше, жеті шелпек тарату үрдісінің астарында - әруақтың атынан елге тамақ беріп, сауабын өліге бағыштау түсінігі жатыр. Осы тұрғыдан қарағанда оның шариғатқа терістігі жоқ. Себебі, жасалған жақсы амалдың сауабын өлген кісіге бағыштау - шариғатымызда да бар.

Енді оны неге жеті деген? Сандардың арасында «7» санын ерекше таңдалып алынуы да бекер емес (жеті шелпек). Өйткені, дінімізде жеті санымен байланыса айтылған үкімдер көп. Мысалы, иманның жеті шарты, жеті рет қағбаны тауаф ету, ит жалаған жерді жеті рет жуу. Шелпектің «жеті» санымен байланыстырылуының мәні де осында жатса керек.

Қалай болғанда да, жеті шелпекті тарату үрдісін дінге теріс деу немесе ширкке алып барар жол деу қиын. Неге десеңіз, жеті шелпек таратқан адам әруақтан медет тілеп емес, о дүниедегі өлген кісіге сауабы және пайдасы тисін деп таратады. Оның үстіне, қазіргі кезде шелпек қазақтың ұлттық тағамының бірі ретінде қалыптасқан. Ең дұрысы – Аллаға мәлім!

Абдусамат Қасым