Елорда төріндегі мешітте қасиетті құран хатымын республикалық қарилар орталығының бас директоры Сәдуақас қари Олжабаев, «Нұр Астана» орталық мешітінің найб имамы Төлеби қари Оспан және Қайырбай қари Дәукен оқиды.
Бұған қоса, қаладағы өзге де мешіттерде тарауих намаздары басталып, құран хатым түсіруді қолға алып отыр.
Алғашқы тарауих намазынан-ақ Алланың үйіне жиылған жамағаттың көптігіне көңіл сүйсінеді. Ес білген баладан еңкейген қарияларға дейін бір қатарда тұрып, оқылған тарауих кешінен бірлік пен берекенің, ынтымақ пен мейірімділіктің самалы ескендей әсер береді. Тарауих намазы соңында бас имам Наурызбай қажы Тағанұлы барша мұсылман қауымына, ел мен жерге Алладан амандық-есендік тілеп, дұға етті.
Жайық НАҒЫМАШ
ummet.kz
"Иманғали" мешітіндегі тарауих намазы
Атырау қаласындағы «Иманғали» орталық мешітінде барша жамағат тарауих намазына жиылды. Қасиетті Рамазан айы қарсаңында оқылған дұға алдында Атырау қаласының жақын арада тағайындалған әкімі Нұрлыбек Жұмахметұлы Ожаев мешітке арнайы атбасын тіреп, оразаны асыға күткен жамағатты қасиетті айдың бастау алған кұнімен құттықтады.
Сонымен қатар, кездесуде Атырау облысы Дін істері басқармасының басшысы Шохаев Еркінбек Керімбекұлы күллі мұсылман қауымын қасиетті Рамазан айымен құттықтап, жамағатты ауызбіршілікке шақырды.
Кездесу соңында ҚМДБ-ның Атырау облысы бойынша өкілі, «Иманғали» орталық мешітінің бас имамы Батыржан Берденұлы Рамазан айы қарсаңында арнайы келген қала әкімінің қадамына жамағат атынан алғысын білдірді.
«Иманғали» орталық мешітінің
баспасөз қызметі
